Qozog‘istonda 7 - 12 iyul kunlari koronavirusdan 111 kishining o‘limi qayd etildi va COVID-19 tashxisidan vafot etganlar soni 375 nafarga yetdi, deb xabar beradi Qozog‘iston SSV.
6 iyul holatiga ko‘ra, Qozog‘istonda koronavirus infeksiyasidan 264 ta o‘lim qayd etilgan edi. Hozirda mamlakat sog‘liqni saqlash vazirligi bir haftada bir marta koronavirusdan vafot etganlar statistikasini berib bormoqda.
"7 - 12 iyul kunlari Qozog‘istonda koronavirus infeksiyasining 111 holati o‘lim bilan yakunlandi... Qozog‘iston Respublikasida jami 375 ta o‘lim holati qayd etildi", - deyiladi SSV xabarida.
Vazirlik ma’lumotlariga ko‘ra, o‘tgan hafta eng ko‘p o‘lim holatlari Qarag‘anda viloyati (37), Olmaota (24) va Nur-Sulton (18) shaharlarida sodir bo‘ldi.
Qo‘shni respublikada koronavirus infeksiyasi holatlarining umumiy soni 58 mingdan oshadi. Sog‘ayib ketgan bemorlar soni esa 33,8 mingga yetdi.