O‘zbekistondagi Sardoba suv omborida yuzaga kelgan toshqin tufayli jabrlangan Qozog‘iston fuqarolariga Bulat Utemuratov fondi tomonidan 150 ta yangi uy-joy qurib beriladi. Bu haqda «Kazinform» xabar qildi.
Qozoq milliarderi va metsenat Bulat Utemuratov buning uchun 6 mln AQSh dollari xayriya qildi.
Yangi uy-joylar Mirzakent shaharchasida quriladi. Bu yerga Dostik, Janaturmis va Jenis ovulida uylari vayron bo‘lgan aholi ko‘chiriladi. Yangi maktab va bog‘chalar quriladi.
O‘tgan yili Bulat Utemuratov fondi Qizilo‘rdada Arisdagi qurol-yarog‘ ombori portlashida jabrlangan 100 nafar ko‘p bolali oilaga 100 ta uy qurib bergan edi.