Oliy Majlis Qonunchilik palatasi deputati Rasul Kusherbayev sud tizimida axborot almashish va surxondaryolik bloger Otabek Sattoriy ishi bo‘yicha munosabat bildirdi. 

U o‘z fikrida quyidagilarni keltirgan:

"Kecha yalpi majlisda tuman va shaharlardagi sudlarning mahalliy  deputatlarga axborot berishini sudning mustaqilligi uchun halaqit berayapti, deb qonunni o‘zgartirishni istayotgan Oliy sud raisi Kozimjon Kamilov boshliq sud hokimiyati uchun bloger bilan bog‘liq bu ish haqiqiy sinov bo‘ladi menimcha: sud mustaqilmi, yo‘qmi? "

Bundan tashqari, sudlarning mahalliy Kengash deputatlari oldida vaqti-vaqti bilan axborot berib  borish tashabbusi muhtaram Prezidentimiz Shavkat Mirziyoyev tomonidan tashabbus qilingan va shu asosda qonunga o‘zgartirish kiritilganligini qo‘shimcha qilgan. 

Shu o‘rinda savol yuzaga kelmoqda. Kusherbayev bunga munosabat bildirib, "O‘z vaqtida buni ijobiy qabul qilgan Oliy sud rahbariyati, bugun bu sudning mustaqilligiga halaqit berishini aytmoqda. Savol: o‘sha vaqtda nega Oliy sud buni aytmadi?" - deya ta’kidlagan. 

Uning so‘zlariga ko‘ra, sudning mustaqilligiga halaqit berayotgan asosiy omillar bu kabi axborot berishdan ko‘ra boshqa kattaroq sabablar bilan bog‘liq bo‘lishi mumkin. 

" Nima bo‘lgandayam biz sudning to‘la mustaqil bo‘lishini qo‘llab quvvatlaymiz, agar bu tizim haqiqatda mustaqil bo‘lib, adolat yo‘lida ishlashni istasa albatta." - degan deputat.