Rossiya SSV Rossiya Fanlar akademiyasining (RAN) Chumakov nomidagi immunobiologik preparatlarni ishlab chiqarish Federal ilmiy-ishlab chiqarish markazi tomonidan ishlab chiqarilgan koronavirusga qarshi vaksinaning klinik sinovlari o‘tkazilishiga ruxsat berdi. Sinovlar Kirov, Sankt-Peterburg va Novosibirskda bo‘lib o‘tadi. SSV ularning boshlanish vaqtini aniq aytmadi, Chumakov markazining bosh direktori Aydar Ishmuxametov ularni noyabr oyida yakunlashni kutmoqda.

Tadqiqotda 3 mingdan ortiq ko‘ngillilar ishtirok etishi rejalashtirilgan - bu, Sog‘liqni saqlash vazirligining ma’lumotlariga ko‘ra, Jahon sog‘liqni saqlash tashkiloti (JSST) talablariga javob beradi. "Vaksinalashdan so‘ng o‘tkazilgan klinik sinovlarning ishtirokchilari kasalxonada 16 kun davomida izolyasiya qilinadi, u yerda ularning holati shifokorlar tomonidan nazorat qilinadi", - deyiladi Rossiya SSV xabarida.

Ayni paytda Rossiyada ro‘yxatdan o‘tgan COVID-19'ga qarshi yagona vaksina - Gamaley markazi tomonidan ishlab chiqilgan Sputnik V vaksinasi. Virusologiya va biotexnologiya markazining "Vektor" vaksinasi sentyabr oyida klinik sinovlarning birinchi bosqichidan o‘tdi. "Vektor", Gamaley markazi va Chumakov markazining ishlanmalaridan tashqari, Rossiyada ro‘yxatdan o‘tishga Sinofarm va AstraZeneca xorijiy kompaniyalarining preparatlari ham tayyorlanmoqda, dedi Sog‘liqni saqlash vaziri Mixail Murashko.