Samarqand xalqaro aeroporti 10 dekabrdan mintaqaviy va xalqaro reyslarga xizmat ko‘rsatishni boshlaydi. Bu haqda Uzbekistan Airports matbuot xizmati xabar berdi.

Qayd etilishicha, ayni paytda yangi aerodrom majmuasi qurilishi to‘liq yakunlangan. Uning tarkibida uzunligi 3105 metr va eni 60 metr bo‘lgan yangi uchish-qo‘nish yo‘lagi hamda 24 ta samolyot stendlari uchun perron mavjud.

Shuningdek, aerodrom majmuasida Xalqaro fuqaro aviatsiyasi tashkilotining ikkinchi toifasiga mos keladigan zamonaviy energiya tejovchi yorug‘lik signalizatsiya uskunalari va qo‘nish tizimi o‘rnatilgan.