Samarqand viloyati Kattaqo‘rg‘on tumanida ketma-ket qiz farzand ko‘rgani sabab qaynonasi va eri tomonidan tahqirlanib kelgan ayol o‘z joniga qasd qildi. Bu haqda «Sevimli» telekanalining «Zamon» informatsion dasturida ma’lum qilindi.

Ma’lum qilinishicha, qaynona va uning o‘g‘li oiladagi arzimas sabablarni bahona qilib, ayolni yillar davomida tahqirlab kelgan. 2020 yilning noyabrida er ayolini yaqin qarindoshlariga tegishli do‘kondan qaynonasi nomiga qarz olganlikda ayblab, uni kaltaklagan. Ayol tanasining turli joylariga elektr kabel, qo‘llari, oyoqlari bilan jarohat yetkazgan.

Shuningdek, er jarohat olgan xotinini uyida davolanishga ko‘ndirib, shu bilan jazodan qutulib qolgan.

Dekabr oyidagi janjallarning birida qaynona kelinini urib, qaynoq suvni uning yuziga sepib yuborgan. Oilaning 16 yoshli to‘ng‘ich qizi buvisi va dadasi tomonidan onasiga muntazam tazyiq o‘tkazilishiga chiday olmay, yashash uyi og‘ilxonasiga arqon bilan o‘zini osib qo‘ygan.

Oradan ikki soat o‘tib, zo‘ravonliklardan to‘ygan ayol ham qizining yonida o‘z joniga qasd qilgan.

Jinoyat ishlari bo‘yicha Kattaqo‘rg‘on tuman sudida bo‘lib o‘tgan ochiq sud majlisida qaynona va o‘g‘il aybli deb topilgan. Sudlanuvchi erkak Jinoyat kodeksining 103-modda (o‘zini o‘zi o‘ldirish darajasiga yetkazish) 2-qismi «a», «b» bandlariga ko‘ra 7 yilga ozodlikdan mahrum qilingan. Qaynonaga esa 4 yilga ozodlikdan cheklash jazosi belgilangan.