Sardobadagi avariya oqibatida yuz bergan toshqin Qozog‘istongacha yetib bordi (video)

Sardobadagi avariya oqibatida yuz bergan toshqin Qozog‘istongacha yetib bordi (video)

Qozog‘iston Respublikasi Prezidenti Qasim-Jomart Toqayev Turkiston viloyatining Maqtaaral tumanidagi favqulodda vaziyatga o‘z munosabatini bildirdi, deya xabar beradi Kazinform.

«O‘zbekistondagi suv ombori to‘g‘onining buzilishi tufayli, Turkiston viloyatida Jenis va Jana Turmis qishloqlari suv ostida qoldi. Bugun Bosh vazir Asqar Mamin va viloyat hokimi O‘mirzaq Sho‘keyev qishloq aholisini evakuatsiya qilish bo‘yicha ko‘rilayotgan chora-tadbirlar to‘g‘risida hisobot berishdi. Men jabrlangan oilalarga yordam ko‘rsatishni buyurdim», - deb yozdi Prezident Twitter sahifasida. 

Eslatib o‘tamiz, 1 may kuni O‘zbekistonning Sirdaryo viloyatidagi Sardoba suv omborida bo‘lgan avariya oqibatida mamlakatda aholi punktlari suv ostida qolgan. Natijada Qozog‘istonning Turkiston viloyati Maqtaaral tumanida chegara yaqinidagi bir necha kollektor suvga to‘lgan. 

Maqtaaraldagi markaziy kollektordan suv toshib, Jenis va Jana Turmis qishloqlarini suv bosdi. «Mirzakent - Jenis - Jana Turmis» mintaqaviy avtomagistrali suv ostida qoldi va transport vositalari o‘tishi qiyinlashdi.