Avval xabar qilganimizdek, kecha Bosh vazir boshchiligidagi Yaponiya hukumati to‘liq tarkibda iste’foga chiqdi. Vazirlarning har biri bu borada Bosh vazir Sindzo Abega yozma murojaat qilgan.
Shuningdek, ovoz berish natijalariga ko‘ra Abening partiyasi Liberal demokratik partiya vakili Yosixide Suga bosh vazirlikka saylandi. Parlamentdagi 462 deputatdan 314 nafari uni yoqlagan.
O‘zbekiston prezidenti Shavkat Mirziyoyev Yaponiya Liberal-demokratik partiyasi yetakchisi Yosixide Sugaga uning mamlakat Bosh vaziri etib saylangani munosabati bilan tabrik yo‘lladi.
Maktubda ikki tomonlama munosabatlarda yuksak darajaga erishilgani ta’kidlangan hamda O‘zbekiston-Yaponiya strategik sherikligi bundan buyon ham izchil mustahkamlanib borishiga ishonch bildirilgan.