Avval ma’lum qilinganidek, bugun AOKA huzuridagi shtabda Davlat soliq qo‘mitasi boshqarma boshlig‘i o‘rinbosari Muzaffar Yusuf Nazarov ishtirokida brifing o‘tkazildi.
Brifingda muhim savol va murojaatlar yuzasidan javob qaytarildi.
Savol: Bir oylik karantin davrida majburiy to‘lovlar va soliq tushumlari necha foizga kamaydi?
Javob: Joriy yilning 16 martidan boshlab respublikamizda koronavirus pandemiyasi munosabati bilan karantin e’lon qilingan bo‘lsa-da, mart oyi yakuni bilan byudjet tushumlariga ta’sir qilmadi.
Jismoniy shaxslarning mol-mulk va yer soliqlari bo‘yicha to‘lov muddati 15 oktyabrga ko‘chirilgani, yakka tartibdagi 195 mingga yaqin tadbirkorlar faoliyatini vaqtincha to‘xtatishga majbur bo‘lganliklari sababli:
– jismoniy shaxslarning mol – mulk va yer soliqlaridan tushumlar 3 barobarga pasaygan (130 mlrd.so‘mdan 40 mlrd.so‘mga tushgan);
– YaTTlarning qat’iy belgilangan solig‘i bo‘yicha tushumlar ham 84 foizga kamaygan (tabiiyki ularning 80% ortig‘i faoliyatini to‘xtatishga majbur bo‘lishgan).
To‘lov muddati uzaytirilgan bo‘lsa-da, fuqarolarimiz 40 mlrd. so‘mlik soliqlarini uyida o‘tirib, interaktiv tarzda to‘lab berdilar.
Savol: Soliq tushumlarining kamayib ketishi karantin qoidalarini yumshatilishiga olib kelishi mumkinmi?
Javob: Fuqarolar sog‘ligi muhimligi tufayli bu holat karantin qoidalarini yumshatilishiga sabab bo‘la olmaydi.