«Toshkent 5 tashabbus harakati» yoshlar festivali doirasida Bosh vazir o‘rinbosari Behzod Musayev yoshlar bilan ochiq muloqot o‘tkazdi.
Muloqotda yoshlardan biri hukumat vakiliga OTMlarida ta’lim onlayn shaklga o‘tkazilgani sababli talabalar yotoqxonalardan chiqarilgani, biroq talabalar yotoqxona to‘lovini o‘quv yili oxiriga qadar to‘lagani haqida gapirdi va poytaxtda ham o‘qib, ham ishlayotgan talabalar yotoqxonalar yopilgach muammolarga duch kelayotganini ma’lum qildi. U ishlayotgan talabalar yotoqxonada qolishi mumkinmi degan mazmunda savol bilan murojaat qildi — deyiladi ’Xalq so‘zi’ xabarida.
«Yotoqxonada qolishi kerak, qolsa bo‘ladi. Agarda talaba oflayn shaklda o‘qisa, yoki masofaviy shaklda o‘qisa-da ishlayotgan talaba bo‘lsa, yotoqxonada qolishi kerak. Men bu masalani o‘rganaman, talaba nega chiqarib yuborilayotganini surishtiraman. Lekin talabalar yoz faslida yotoqxonada qolmaydi, o‘qish davomida bo‘lsa talaba yotoqxonadan bir yilda o‘n oy foydalanish huquqiga ega va ishini davom ettirishi mumkin. Agarda, yozda ham talabalar ishlaydi, talabalar yotoqxonadan foydalansa bo‘ladimi, deya taklif bildirsangiz, u masalani ham hal qilamiz», dedi B.Musayev.