“Tolibon” harakati Afg‘onistonni qariyb to‘liq qo‘lga kiritgach, ularning “norasmiy og‘asi” — Pokiston diplomatik muzokaralarni boshlab yubordi. Pokiston tashqi ishlar vaziri shu kunlarda Tojikiston, O‘zbekiston, Turkmaniston va Eronga amaliy tashrif bilan yuribdi.

Bugun u Tojikiston rahbari Emomali Rahmon bilan uchrashibdi. Tojikiston tarafining Afg‘oniston bo‘yicha talablari e’tiborga molik:

Birinchidan, Tojikiston barcha afg‘onistonliklar, ayniqsa, tub xalqlar — tojiklarning istak-xohishlari inobatga olinmasa, “Tolibon” hukumatini tan olmaydi.

Ikkinchidan, Tojikiston fikricha, “Tolibon” inklyuziv, ya’ni jamiyatning barcha qatlami ishtirokida hukumat tuzish bo‘yicha dastlabki va’dalarini bajarmayapti. Mamlakat aholisining 46%ini tashkil qiladigan tojiklar albatta yangi hukumat tarkibida bo‘lishi kerak, demoqda Tojikiston.

Uchinchidan, Afg‘onistonning davlat tuzilishi referendum orqali barcha aholi qatlami xohish-istaklarini inobatga olgan holda shakllantirilishi kerak. “Tojiklar Afg‘onistonning bo‘lajak hukumatida o‘z o‘rniga ega bo‘lishi kerak”, demoqda Emomali Rahmon.