26 fevral kuni O‘zbekiston Milliy olimpiya qo‘mitasi (MOQ)da Tokioda bo‘lib o‘tadigan XXXII olimpiya hamda XVI paralimpiya o‘yinlariga tayyorgarlikka bag‘ishlangan matbuot anjumani bo‘lib o‘tdi. Bu haqda Toshkent shahar hokimligi matbuot xizmati xabar bermoqda.

“Olimpiya qo‘mitasi rahbarlari jurnalistlarimizning sportchilarimizning Olimpiadadagi ishtiroki haqidagi savollariga javob berishdi va 2020 yilda Tokioda bo‘lib o‘tadigan Olimpiya va Paralimpiya o‘yinlarida delegatsiyamizning sport formasi va jihozlarini taqdim etishdi”, — deyiladi xabarda.

Liboslar Tokio shahri iqlimiga moslab ishlab chiqariladi.

Sportchilar formasini tayyorlashda 100 dan ortiq milliy va xorijiy brendlar tenderda ishtirok etdi. Yakuniy natijalarga ko‘ra, O‘zbekiston delegatsiyasi XXXII yozgi olimpiada o‘yinlarida milliy Buka brendi liboslarida ishtirok etadi.

Musoboqa ishtirokchilarining liboslaridagi ustuvor rang yashil va oq bo‘ladi.