1999 yilning 16 fevral sanasida sodir bo‘lgan qo‘poruvchilikda ishtirok etib, 23 yildan beri qidiruvda bo‘lgan 55 yoshli U.S. ushlandi va O‘zbekistonga olib kelindi.

Ma’lum bo‘lishicha, Toshkent viloyatida tug‘ilgan U.S. terrorchilik harakati sodir bo‘lgan yili mart oyida aylanma yo‘llar orqali xorijga chiqib ketgan. U shuningdek, “Turkiston islom harakati” xalqaro terroristik tashkilotining O‘zbekistondan bo‘lgan a’zolarini jo‘natish bilan ham shug‘ullangan.

U.S. 2001 yildan beri sohta pasport bilan MDH davlatrlaridan birida yashab kelgan. Huquq tartibot organlarining sa’yi harakati bilan u ushlangan va O‘zbekistonga olib kelingan. Hozirda unga nisbatan qo‘zg‘atilgan jinoyat ishi doirasida tergov harakatlari olib borilmoqda.