Estoniyaning Yevroparlamentdagi deputati Yaak Madison AQSh sobiq prezidenti Donald Tramp nomzodini tinchlik bo‘yicha Nobel mukofotiga ko‘rsatmoqchi.
Estoniya Konservativ xalq partiyasi vakili bo‘lgan siyosatchi o‘z taklifiga izoh berar ekan, Tramp so‘nggi 30 yil davomida davlat rahbari sifatida urush boshlamagan yagona prezident ekanini ta’kidladi.
"Uning rahbarligida Yaqin Sharqda mintaqada tinchlik va barqarorlikni ta’minlashga yordam beruvchi bir qator tinchlik bitimlari imzolandi. Ko‘ramiz, tinchlik bo‘yicha Nobel mukofotini kim oladi", - deb yozdi Madison «facebook»dagi sahifasida.
Uning ta’kidlashicha, Tramp nomzodini ilgari surayotgan yolg‘iz uning o‘zi emas. "Biz bilamizki, ariza beradiganlar qancha ko‘p bo‘lsa, muvaffaqiyat qozonish imkoni ham shuncha ko‘p bo‘ladi", - deydi u.
Tinchlik bo‘yicha Nobel mukofoti Oslo shahrida 1901 yildan buyon har yili topshirib kelinadi. Nobel jamg‘armasi nizomiga ko‘ra, mukofotga turli mamlakatlarning parlament va hukumatlari vakillari, xalqaro sud a’zolari, universitet rektorlari, Norvegiyaning Nobel qo‘mitasi sobiq va amaldagi maslahatchilari nomzodini ko‘rsatishi mumkin.