AQSh prezidenti Donald Tramp Nyu-Yorkni bo‘ronlardan himoya qilish uchun to‘siq devori qurish g‘oyasini tanqid qildi, deya xabar beradi RIA Novosti.
Nyu-Yorkdan bir necha mil uzoqlikdagi bandargohda "ulkan to‘siq" qurilishi AQSh armiyasining Nyu-Yorkni tobora ko‘payib borayotgan bo‘ronlardan himoya qilishga qaratilgan muhandislik loyihalaridan biridir, deb yozadi New York Times. To‘siqning qiymati 119 milliard dollarga baholanmoqda, qurilish 25 yilgacha davom etishi mumkin.
"Nyu-York sohillaridagi bo‘ronlardan himoya qilish uchun 200 milliardlik dengiz devori bu ahmoqona va atrof-muhit uchun zararli g‘oya, kerak bo‘lganda ishlamaydi. Va u dahshatli bo‘lib ko‘rinadi", deb yozdi Tramp Tvitterda.
2016 yilgi saylovlar oldidan Tramp Meksika bilan chegarada quruqlikdagi devorni qurishga va’da berdi, u yerdan AQShga eng ko‘p noqonuniy muhojirlar keladi. Devorni qurish masalasi 2018 yil oxirida - 2019 yil boshida byudjet inqiroziga sabab bo‘ldi.
Natijada, Tramp Kongressdan talab qilingan pulni ololmadi va chegaradagi to‘siqlarni qurish uchun byudjetning boshqa moddalarini qayta taqsimladi.