Avval xabar qilganimizdek, «Koronavirus pandemiyasining salbiy ta’sirini kamaytirish uchun turizm sohasini qo‘llab-quvvatlashga doir kechiktirib bo‘lmaydigan chora-tadbirlar to‘g‘risida» Prezident Farmoni qabul qilindi.
Farmonga muvofiq, 2020 yilning 1 iyunidan «yashil» va «sariq» toifadagi hududlarda ichki turizm qayta yo‘lga qo‘yiladi hamda fuqarolariga O‘zbekistonga kirishga ruxsat etiladigan mamlakatlar ro‘yxati belgilanib kirish turizmi bosqichma-bosqich qayta tiklanadi.
«Yashil» va «sariq» toifadagi hududlarda ichki turizmga ruxsat beriladi
Shuningdek, turoperatorlar, turagentlar, shuningdek, joylashtirish vositalari (mehmonxonalar, dam olish uylari va b.) uchun:
-
2020 yil 1 iyundan 31 dekabrga qadar foyda solig‘i stavkasi belgilangan stavkaga nisbatan 50 foizga kamaytiriladi;
-
2020 va 2021 yil yakunlari bo‘yicha zararlarni Soliq kodeksida nazarda tutilgan miqdor bilan cheklamagan tarzda o‘tkazish huquqi beriladi;
-
2021 yil 1 yanvargacha bo‘lgan davrda turistik (mehmonxona) yig‘imini hisoblash va to‘lash to‘xtatiladi.
Shuningdek, joylashtirish vositalariga alkogol mahsulotlari bilan chakana savdo qilish huquqi uchun mahalliy yig‘imni to‘lashni 2021 yil 1 yanvargacha bo‘lgan muddatga davlat soliq xizmati organlarini xabardor qilish va keyinchalik ularni 12 oy mobaynida teng qismlarda to‘lash asosida foizsiz kechiktirish (bo‘lib-bo‘lib to‘lash) huquqi taqdim etiladi.