Ukraina prezidenti Vladimir Zelenskiy mamlakatning “Ukraina Xalqaro Avialiniyalari” aviakompaniyasiga tegishli Boeing 737-800 rusumli yo‘lovchi samolyoti halokatga uchrashi munosabati bilan 9 yanvarni “motam kuni” deb e’lon qildi. Xabar qilinishicha, kecha kechqurun o‘tgan ishchi majlis oxirida shunday qarorga kelingan.
Motam kunida davlat hokimiyati organlari, mahalliy o‘zini-o‘zi boshqarish muassasalari, tashkilot va idoralarga tegishli inshootlar oldida o‘rnatilgan Ukraina bayrog‘i aviahalokatda qurbon bo‘lganlar xotirasi uchun yarmigacha pastga tushiriladi.
Mavzuga doir: Tehronda qulagan samolyot yo‘lovchilarining aksari Eron va Kanada fuqarolari bo‘lgan
Eron poytaxti Tehrondan Ukraina poytaxti Kiyev shahriga PS 752 raqami bilan parvozni amalga oshirayotgan, bortida 176 yo‘lovchi, shu jumladan, 9 ekipaj a’zosi bo‘lgan Boeing 737-800 samolyoti kecha, 2020 yil 8 yanvar kuni mahalliy vaqt bilan soat 6:12 da Imom Humayniy xalqaro aeroportidan havoga ko‘tarilgan va oradan 2 daqiqa o‘tib, aeroport yaqinidagi Parand mavzesida qulab tushgan.
Ukraina tashqi ishlar vazirligining ma’lum qilishicha, halok bo‘lganlar quyidagi davlatlar fuqarolaridir:
- Eron fuqarolari – 82 nafar
- Kanada fuqarolari – 63 nafar
- Ukraina fuqarolari – 11 nafar
- Shvetsiya fuqarolari – 10 nafar
- Afg‘oniston fuqarolari – 4 nafar
- Germaniya fuqarolari – 3 nafar
- Buyuk Britaniya fuqarolari – 3 nafar.