Facebook kompaniyasi aprelning oxirida Zoom servisining raqobatchisi – Messenger Rooms servisini taqdim etgan edi. Endi esa uni WhatsApp messenjeriga ham integratsiya qildi.

Messenger Rooms servisi 50 nafargacha kishi ishtirokida guruhli videochatlar o‘tkazish imkonini beradi. Uni dastlab WhatsApp Web desktop ilovasiga o‘rnatishgan edi. Endi esa Android hamda iOS tizimlariga mo‘ljallangan WhatsApp kliyentlarida ham Messenger Roomsʼga o‘tkazuvchi havolalar paydo bo‘ldi.

Hozircha bu funksiya messenjerning beta-versiyalarida (Android uchun 2.20.163, iOS uchun esa 2.20.52.6 raqamli jamlanmalarda) mavjud.

Mazkur talqinlarni o‘rnatib olgan WhatsApp testerlari bevosita shu messenjerning o‘zidan turib Messenger Rooms guruhli video qo‘ng‘iroqlarini yaratishlari va unga suhbatdoshlarni taklif etishlari mumkin.

WhatsAppʼning ushbu imkoniyatidan hozircha AQSh va boshqa ayrim mamlakatlardagi yuzerlar foydalana olishadi. Uning barqaror talqiniga Messenger Rooms keyinroq rasman va to‘liq qo‘shiladi.