Honda kompaniyasi butun jahon bo‘ylab mashina ishlab chiqaruvchi barcha konveyerlari to‘xtab qolganini e’lon qildi. Lekin bunga koronavirus pandemiyasi emas, balki kiberhujum sababchi bo‘ldi.

Ma’lum bo‘lishicha, yapon konsernining serverlarini buzib kirgan xakerlarning harakatlari sababli avtomobilsozning tarmoq infratuzilmasi ishdan chiqqan. Markaziy serverlarga kiberhujum joriy hafta boshida uyushtirilgan. Keyin esa virus butun korporativ tarmoq bo‘ylab tarqalib ketgan. Natijada Snake/EKANS nomli tovlamachi dastur xodimlarning ish kompyuterlarini bloklab qo‘yib, ochish kaliti uchun to‘lov talab qilingan.

«Honda tarmog‘iga kiberhujum bo‘lganini kompaniya tasdiqlaydi. Shuningdek, ayni damda ma’lumot sizib chiqmaganini ham tasdiqlashimiz mumkin. Hozirda hujumning ta’sirini imkon qadar kamaytirish hamda ishlab chiqarish, savdo va ishlab chiqish sohalarimizning to‘laqonli faoliyatini tiklash bo‘yicha ish olib borilyapti. Ayni paytda biz mazkur voqeaning biznesga ta’siri o‘ta kam bo‘lishini ko‘rmoqdamiz», dedi Honda vakillari.

Umumiy hisobda Honda’ning o‘n bitta, shu jumladan AQShdagi beshta zavodi kiberhujum tufayli to‘xtab qolgan. Keyinroq kompaniyaning matbuot xizmati Amerikadagi konveyerlarning faoliyati tiklanganligini ma’lum qildi. Biroq haliyam Turkiyadagi avtomobil bo‘linmasi, Hindiston va Braziliyadagi mototsikllar ishlab chiqarilishi to‘xtab turibdi.

At this time Honda Customer Service and Honda Financial Services are experiencing technical difficulties and are unavailable. We are working to resolve the issue as quickly as possible. We apologize for the inconvenience and thank you for your patience and understanding.

— Honda Automobile Customer Service (@HondaCustSvc) June 8, 2020

Honda vakillarining jurnalistlarga aytishlaricha, kiberhujum ishlab chiqarishga ta’sir etgan bo‘lsa-da, «avtomobil brendining dilerlari yoki mijozlariga ziyon yetmagan».