Bugun AOKA huzuridagi shtabda Sanitariya-epidemiologiya nazorati davlat inspeksiyasi boshlig‘i Nurmat Otabekov ishtirokida brifing o‘tkazildi.
Brifingda muhim savollar yuzasidan javob qaytarildi:

Savol: Xitoyliklar yuborgan testlardan koronavirus yuqayotgan ekan shu gaplar haqiqatga to‘g‘ri keladimi? Hattoki ba’zi davlatlar bu holatlarni aniqlaboq, bu testlarni Xitoyga qaytarib yuborishgan ekan.

Javob: Birinchidan test sistemasi - bu virusga o‘ta sezuvchan reaktiv bo‘lib reaktivga virusni joylashtirib bo‘lmaydi. Shuning uchun Xitoyliklar yuborgan testlardan koronavirus yuqayotganligi haqidagi gaplar asossiz, internet olamidagi yolg‘onlardan biri.

Test sistemalardan kasallik yuqmaydi, biroq, ba’zan ushbu testlarning sezgirligi past bo‘lishi mumkin. Bunday hollarda kasallik yuqmagan taqdirda ham, kasalligi borlarga «manfiy», kasalligi yo‘qlarga «musbat» degan javob berilishi ehtimoli bor. Shuning uchun amaliyotda qo‘llanilishidan avval barcha testlar sezgirlik nuqtai nazaridan tekshiruvdan o‘tkaziladi.