Xorazmda 39 yoshli aka mast ukasini pichoqlab o‘ldirdi
14.03.2021 13:05,
394
Xorazm viloyati Gurlan tumanida 2021 yil 7 mart kuni aka birga yashab kelayotgan ukasini pichoqlab o‘ldirdi. Bu haqda Ichki ishlar vazirligi axborot xizmati xabar berdi.
Ma’lum qilinishicha, qotillik tungi soat 00:30 atrofida tumanning Do‘simbe mahallasida sodir bo‘lgan. Xabarda keltirilishicha, hech qayerda ishlamaydigan 39 yoshli aka bilan o‘z uyida mast holda bo‘lgan 35 yoshli ukasi o‘rtasida janjal kelib chiqqan. Janjal payti aka oshxona pichog‘i bilan ukasining qorin qismiga bir marta sanchib, og‘ir tan jarohati yetkazgan. Oqibatda, u voqea joyida vafot etgan.
Ushbu holat yuzasidan Jinoyat kodeksining 104-moddasi 3-qismi bilan jinoyat ishi qo‘zg‘atilgan.