Bugun AOKA huzuridagi shtabda Koronavirusga qarshi kurashish shtabi a’zosi Nargiza Nurullayeva ishtirokida brifing bo‘lib o‘tdi. Brifingda koronavirus infeksiyasi bo‘yicha muhim savollar yuzasidan javob qaytarildi.
Savol: Xususiy klinikalarda test narxlari biror tashkilot tomonidan nazorat qilinadimi yoki ular o‘zlari xohlagan narxda test tekshiruvi o‘tkazishlari mumkinmi?
Javob: Xususiy klinikalar olib keladigan testlarni o‘zlari sotib oladi va shundan kelib chiqib narxlarni o‘zlari belgilaydi.
Savol: OAVlarda bir xil qon bosim pasaytiruvchi dori vositalarni qabul qilmaslik kerak deyilgan. Shuning uchun men shu dorilarni ichishni to‘xtatgan edim. 1 haftadan beri qon bosimim oshib boryapti. Nima maslahat berasizlar?
Javob: Pandemiya boshlang‘ich davrida 2 ta guruh gipotenziv dori vositalari bo‘yicha shunga o‘xshagan ma’lumot bor edi.
Lekin bugungi kunda Yevropa kardiologlar jamiyati tomonidan aytilgan: shifokorlar tomonidan tavsiya qilgan barcha qon bosimini pasaytiruvchi dori vositalarni doimiy ravishda qabul qilish kerak.
COVID-19 da bu dorilarning nojo‘ya ta’sirlari yo‘q.