27 sentyabr, yakshanba kuni Belarusda bo‘lib o‘tgan ommaviy noroziliklarda 300 dan ortiq kishi hibsga olindi. Bu haqda Belorusda rasman ro‘yxatdan o‘tmagan "Bahor" (Vesna) inson huquqlari markazi xabar bermoqda. 

Doimiy ravishda yangilanib turadigan hibsga olingan namoyishchilar ro‘yxati Vesna veb-saytida e’lon qilingan.

Respublika Ichki ishlar vazirligi matbuot kotibi Olga Chemodanova mamlakatning turli shaharlarida 200 ga yaqin kishining hibsga olinganini tasdiqladi.

Vesnaga ko‘ra, Mogilev, Brest, Berezina, Molodechno, Grodno, Gomel, Vitebsk, Braslav, Bobruysk, Baranovichi, Mixanovichi, Soligorsk, Svetlogorsk, Jodin, Orsha, Novopolotsk, Volkovysk, Glubokoye shaharlarida hibsga olinish holatlari kuzatilgan. Hibsga olinganlar orasida bir nechta jurnalistlar, xususan, NewGrodno portalining bosh muharriri Igor Bublikov, "Mogilev viloyati" (Mogilevskiy region) nashrining muxbiri, Belorus Jurnalistlar uyushmasi a’zosi Vladimir Laptsevich, tut.by nashri fotomuxbiri Yekaterina Gordeyeva va ushbu portalning jurnalisti Olga Komyagina, shuningdek, Spektr nashrining muxbir-operatori Artur Pogosyanlar bor. 

9 avgust kuni bo‘lib o‘tgan saylovlardan beri Belorusda ommaviy norozilik namoyishlari bo‘lib o‘tmoqda, Markaziy saylov komissiyasining rasmiy ma’lumotlariga ko‘ra, mamlakatning amaldagi prezidenti Aleksandr Lukashenko 80,1% ovoz bilan g‘olib bo‘lgan. Svetlana Tixanovskaya 10,12% bilan ikkinchi o‘rinni egalladi, u ovoz berish natijalarini tan olmadi va Belorus oppozitsiyasining Muvofiqlashtiruvchi kengashini tuzishda qatnashdi. Dastlabki kunlarda bu harakatlar namoyishchilar va huquqni muhofaza qilish idoralari o‘rtasidagi zo‘ravon to‘qnashuvga aylandi. Muxolifat norozilik namoyishini davom ettirishga chaqirmoqda, rasmiylar noqonuniy xatti-harakatlarni to‘xtatishni talab qilmoqda.