Yaponiyalik tadqiqotchilar niqoblar havodagi koronavirus zarralaridan himoya qila olishini, ammo hatto professional darajadagi qoplamalar ham yuqtirish xavfini to‘liq bartaraf eta olmasligini ko‘rsatib berdi.

Tokio universiteti olimlari maneken boshlari bir-biriga qaratgan holda xavfsiz kamerani qurishdi. Nebulayzer bilan jihozlangan bitta bosh yo‘talni simulyasiya qilib berdi va haqiqiy koronavirus zarralarini chiqardi. Ikkinchisi havo yo‘li orqali kirib boradigan viruslarni yig‘ish kamerasi bilan tabiiy nafas olishni taqlid qildi.

Paxta niqobi taqilgan maneken bosh niqobsiz holatga qaraganda virus yuqish xavfini 40% gacha kamaytiradi. Tibbiy mutaxassislar tomonidan ishlatiladigan N95 niqobi 90% gacha to‘sib qo‘ygan. Biroq, hatto N95 taqilganda ham, ba’zi virus zarralari yashirincha yuzga o‘tgan.

Yo‘talayotgan boshga niqob kiydirilganda paxta va tibbiy niqoblari virus yuqishining 50% dan ortig‘ini to‘sib qo‘ydi.

"Virus qabul qiluvchisi ham, virus tarqatuvchisi ham niqob taqqanda sinergetik ta’sir ko‘rsatildi", deb yozgan tadqiqotchilar chorshanba kuni chop etilgan tadqiqotda.

Tibbiyot mutaxassislari o‘rtasida COVID-19 virusi havo orqali tarqalishi mumkinligi to‘g‘risidagi fikrlar tobora ko‘proq yangramoqda. AQSh Kasalliklarni nazorat qilish va oldini olish markazi (CDC) qo‘zg‘atuvchining havoda bir necha soat turishi mumkinligi uchun ushbu oyda ko‘rsatmalarini qayta ko‘rib chiqdi.

Yaponiyalik tadqiqotchilarning alohida guruhi superkompyuter simulyasiyalaridan foydalanib namlik virus zarralarining havoga tarqalishiga sezilarli ta’sir ko‘rsatishi mumkinligini ko‘rsatdi.