Iroq hukumati norozilik namoyishlari qatnashchilarining talablarini qabul qildi, deya xabar beradi Anadolu agentligi. Bosh vazir Odil Abdul Mahdining tashabbusi bilan o‘tkazilgan hukumatning favqulodda yig‘ilishida ana shunday qarorga kelingan.
Hukumat qashshoqlik va ishsizlikka qarshi kurashish uchun bir necha bosqichdan iborat milliy dasturni amalga oshiradi. Birinchi bosqichda kam ta’minlangan oilalarga yer uchastkasi va turar joy ajratiladi, 150 ming ishsizga uch oy davomida 147 dollardan yordam puli to‘lanadi.
Bundan tashqari, mamlakat bo‘ylab 100 mingta turar joy quriladigan bo‘ldi.
Iroqda 1 oktyabr kuni hukumatga qarshi namoyishlar boshlangan edi. Namoyishlarning asosiy sababi ishsizlik va korrupsiya bo‘ldi. OAVda mazkur namoyishlarga “Ochlar inqilobi” degan nom berildi. Oxirgi ma’lumotlarga qaraganda, norozilik aksiyalarida 104 kishi halok bo‘lgan.