Sof.uz‘ga Toshkent shahrining Yunusobod tumanidan videomurojaat kelib tushdi.

Murojaatchining aytishicha, Yunusobod tumani, 9-mavzedagi 259-maktabga kirish yo‘li ta’mirtalab bo‘lib, ayniqsa, qish mavsumida loy kechib o‘tishga to‘g‘ri keladi.

Bolalar maktabga qatnaydigan yo‘lning taxminan 200 metri asfalt qilinmagan. Avtomobillar ko‘p yurishi oqibatida chuqurlar yuzaga kelib, yog‘ingarchilik paytida suv va loyga to‘lgan.

Shuningdek, yo‘l atrofiga maishiy chiqindilarga tashlangan.

Murojaatchi "ishqilib bu video e’lon qilingandan so‘ng yo‘lni yopib qo‘yishmasa bo‘ldi" degan xavotirda.

"Hech bo‘lmasa shag‘al to‘kib berishsa hamma duo qiladi. E’tiborsiz qolmaydi degan umiddamiz" deydi murojaatchi.