Telegram kanallarida “Dehqonobod tumani, Sarchashma mahallasi Duob qishlog‘idagi ko‘prik juda abgor ahvolda. Har kuni bu yerdan yuzlab aholi foydalanadi. O‘quvchilar ham o‘tadi. Tuman mutasaddilaridan ko‘prik ta’miriga yordam berishlarini so‘raymiz...” deya izoh berilgan surat e’lon qilingan edi.
Mazkur holat tuman hokimi o‘rinbosari Sherdil Ergashev, tuman Obodonlashtirish boshqarmasi boshlig‘i Jovli Himmatovlar ishtirokida o‘rganib chiqildi, deya xabar berdi tuman hokimligi Axborot xizmati.
Voqea joyida bo‘lgan mas’ullarning aytishicha, mazkur ko‘prik ko‘rinishi jihatidan vahimali bo‘lsa-da, aholi foydalanishi uchun yaroqli.
“Shunga qaramasdan, biz albatta bu ko‘prikni ta’mirlash choralarini ko‘ryapmiz. Ko‘prik dasturga tushmagani bois, ko‘prikni saxovatpesha tadbirkor ko‘magida ta’miralashni rejalashtiryapmiz”, — degan tuman Obodonlashtirish boshqarmasi boshlig‘i Jovli Himmatov.