O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida Qurilish vazirligi tomonidan matbuot anjumani tashkil etildi.

Joriy yilda mamlakatimizda Ipoteka dasturi asosida 207 ta massivda 1 ming 75 ta ko‘p qavatli uylar qurilishi olib borilmoqda. Jami xonadonlar soni – 45,5 mingni tashkil etmoqda.

Mazkur uylarning qurilish-montaj ishlari sifati yuzasidan Qurilish sohasida nazorat inspeksiyalari tomonidan nazorat o‘rnatilgan. Qurilishda aniqlangan kamchiliklarni bartaraf etish bo‘yicha jami 2 ming 880 ta yozma ko‘rsatmalar berilgan. Uylar qurilishida 52 ta holat bo‘yicha jami 2 milliard 783 million so‘mlik sifatsiz bajarilgan ishlar hajmi chegirib qolindi.

Shuningdek, 47 ta mansabdor shaxsga nisbatan chora ko‘rish uchun hujjatlar tayyorlanib, sudlarga yuborildi. Qolaversa, qurilish-montaj ishlari sifatsiz bajarilgan 12 ta ob’yektda ishlar vaqtincha to‘xtatildi. Ob’yektlarda sifatsiz material va buyumlardan foydalanilganlik uchun tegishli tashkilotlarga 26 ta taqdimnoma kiritildi.