Prezident Shavkat Mirziyoyev 16 aprel kuni Samarqand viloyat faollar kengashida Paxtachi tumani nomini yaqin kelajakda o‘zgartirish bo‘yicha taklif kiritdi. Bu haqda «Gazeta.uz» xabar berdi.
«Menga Paxtachi nomli tuman yoqmaydi. Nimaga u Paxtachi bo‘lishi kerak? Buning tarixi yo‘qmi? Karmana va boshqa tumanlarning o‘z tarixi bor. Tarixchilar tuman tarixini o‘rganib, kelajakda shoshilmasdan fursatdan foydalanib nomini ham o‘zimizga munosib qilib qo‘yaylik. Paxtachi degan nom, masalan, menga yoqmaydi. Nima biz paxtachi bo‘lib o‘tib ketaveramizmi?», — degan Prezident.
Yig‘ilishda, shuningdek, Paxtachi tumanini rivojlantirish uchun barcha imkoniyatlar mavjudligi, aholining turmush sharoitini yuksaltirish, tadbirkorlikni rivojlantirish uchun yana qanday yordam kerak bo‘lsa, berilishi ta’kidlangan.
Tuman xo‘jaligi, asosan, qishloq xo‘jaligiga ixtisoslashgan. Sanoat, transport, aloqa korxonalari mavjud. Tuman aholisi paxtachilik, g‘allachilik, sabzavotchilik, polizchilik, chorvachilik va pillachilik bilan shug‘ullanadi.