"Bulduruq, bu yangi atama emas. Xalqimizda oldindan ’’bir bulduruq, uch qorga tatiydi’’ degan naql yuradi, deydi Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanali muallifi, doktorant E. Abdulahatov.
Bu hodisa kuz-qish mavsumlarida sovuq oqimning chekinishidan so‘ng, antitsiklon pereferiyasi davrida yuzaga keladi.
Antitsiklon pereferiyasida havoda nisbiy namlikning o‘ta yuqoriligi(o‘ta qalin tuman), sezilar-sezilmas hududga xos shamollar hamda havo haroratining -5 darajadan past sovuq bo‘lgan paytda kuzatiladi.
Bu paytda ko‘rinuvchanlik keskin cheklanib, havoda suv bug‘lari kristalizatsiyalashadi.
Fizikada bu, sublimatsiya hodisasi deyiladi. Suv bug‘ining bug‘ holatdan qattiq holatga o‘tish jarayoni.
Natijada, havoda kristalizatsiyalashgan zarrachalar yengil shamol kuchi ta’sirida daraxt shoxlari, simyog‘och va maysa ustiga yopishadi.
Bulduruqning vodiy viloyatlarida davom etishi 30-31 dekabr kunlari ham kuzatilishi mumkin. Antitsiklon pereferiyasi butunlay chekingandan so‘ng, hodisa kuzatilmaydi.