Maktab o‘quvchilari o‘rtasidagi AIMO Osiyo xalqaro matematika olimpiadasi 2012 yildan buyon o‘tkazib kelinadi. Olimpiadada Osiyoning Xitoy, Malayziya, Singapur, Indoneziya, Tailand, Filippin, Tayvan, Makao, Janubiy Koreya, Qozog‘iston va O‘zbekiston kabi mamlakatlarining 2-11- sinf o‘quvchilari bilan bir qatorda Bolgariya, Braziliya davlatlaridan ham o‘quvchi yoshlar ishtirok etishadi - deb xabar bermoqda ’Xalq so‘zi’.
Olimpiada ikki — saralash va final bosqichlaridan iborat. Joriy saralash bosqichida Navoiy shahridagi 16-umumta’lim maktabining 7 nafar iqtidorli o‘quvchisi — Dilnurbek Shodiyev, Botirbek Qodirov, Suxrobjon Isroilov, Nurafshona Muftillayeva, Akbarjon Zokirov, Amirshoh Muftillayev, Sardorbek Asqatov muvaffaqiyatli ishtirok etishib, oltin, kumush hamda bronza medallarini qo‘lga kiritishdi. Maktabning 4, 5, 6 va 8-sinflarida ta’lim olayotgan bu o‘quvchilar endi avgust oyida Koreya Respublikasi mezbonlik qiladigan final bosqichida ishtirok etishadi.
— O‘quvchilarning yutuqlarga erishishida Dilnoza Yodgorova, Dildora Norova, Muattar Xalilova, Zahira Isayeva kabi tajribali pedagoglarimizning mehnatini e’tirof etish joiz, — deydi maktab direktorining o‘quv ishlari bo‘yicha o‘rinbosari Madamin Tursunov. — Ayni kunlarda ular o‘quvchi yoshlarni final bosqichiga individual grafik asosida tayyorlashmoqda.