Oliy va o‘rta maxsus ta’lim vazirligi ijtimoiy tarmoqlarda O‘zbekiston davlat jismoniy tarbiya va sport universitetida talabalarga stipendiya berilmayotganligi haqidagi xabarlarga izoh berdi.

Xabarda aytilishicha, holat vazirlik tomonidan tezkor ravishda o‘rganilgan. 2019/2020 o‘quv yilidan boshlab talabalarga to‘lov-kontrakt qiymati miqdorlari ikki xil ko‘rinishda – “stipendiyali” va “stipendiyasiz” etib belgilandi.

Shu sababli, universitetda to‘lov-shartnoma asosida o‘qiydigan talabalarga stipendiya tayinlash va berishdagi kechikishlar o‘z navbatida talabalar tomonidan to‘lovlarni turli miqdorda va vaqtda amalga oshirilishi bilan bog‘liq, deyiladi vazirlik xabarida.

Aytilishicha, hozirda barcha tashkiliy masalalar yakuniga yetgan va to‘lov-shartnoma asosida o‘qiydigan talabalarning plastik kartalariga stipendiya o‘tkazib berilgan.

Stipendiyaning naqd pul qismi esa, 18 noyabr – dushanba kunidan tarqatilishi ma’lum qilingan.

Shuningdek, Oliy va o‘rta maxsus ta’lim vazirligi talabalar, ularning ota-onalari, keng jamoatchilik vakillari bilan muloqot qilishga tayyorligini bildirib, muammolar mavjud bo‘lsa, mana bu yerga yozib qoldirish mumkinligini aytdi.