Bugun “Saxovat va ko‘mak” umumxalq harakati Rishton tumanining Qirg‘iziston Respublikasi Botken viloyati hududidagi anklav Cho‘ng‘ara qishlog‘iga yetib bordi.
Shuhrat G‘aniyevni chegara hududida Botken viloyati gubernatori Alisher Abdurahmonov kutib oldi.
- Koronavirus pandemiyasi boshlangan chog‘da O‘zbekistonning Qirg‘izistonga, Farg‘ona viloyatining Botken viloyatiga dezinfeksiya va yakkalanish – sanitariya vositalaridan beg‘araz ko‘rsatgan yordami uchun xalqimiz chuqur minnatdorchilik izhor qilmoqda, - dedi Botken viloyati gubernatori Alisher Abdurahmonov. – Do‘st boshiga ish tushganda bilinadi. O‘zbek-qirg‘iz xalqi azaldan mustahkam do‘stdir.
Shundan so‘ng un va yog‘ ortilgan mashinalar Cho‘ng‘ara ko‘chalari bo‘ylab yo‘l oldi.
Shu kuni viloyat hokimi Shuhrat G‘aniyev Cho‘ng‘ara qishlog‘i aholisi vakillari bilan uchrashib, koronavirus pandemiyasi sharoitidagi vaziyatni muhokama qildi. Cho‘ng‘araliklarga bundan buyon ham har tomonlama ko‘mak berib borilaveradi, dedi hokim.