Oliy Majlis Qonunchilik palatasi Spikerining o‘rinbosari, deputat Odiljon Tojiyevni ma’lum qilishicha, Oliy Majlis Qonunchilik palatasi Kengashi qarori bilan, bugun Qonunchilik palatasining navbatdagi yig‘ilishi bo‘lib o‘tishi belgilandi.
Yig‘ilishda bir qator qonun loyihalari muhokamasi bo‘lib o‘tadi. Xususan, Toshkent viloyatining Oqqo‘rg‘on, Ohangaron, Bekobod, Bo‘stonliq, Bo‘ka, Zangiota, Yuqori Chirchiq, Qibray, Parkent, Piskent, O‘rta Chirchiq, Yangiyo‘l tumanlari va Olmaliq, Chirchiq, Angren, Yangiyo‘l, Bekobod shaharlari chegaralarini o‘zgartirish masalasi deputatlar muhokamasiga kiritilgan.
Deputat O.Tojiyevni alohida qayd etishicha, ushbu masala tegishli komissiyalar tomonidan jiddiy o‘rganilgan, aholini fikri olingan va qonunchilikda belgilangan tartibga ko‘ra Xalq deputatlari mahalliy va hududiy kengashlarda muhokama qilinib, qarorlar qabul qilinib, Hukumat tomonidan Qonunchilik palatasiga kiritilgan.