Turkiyalik mutaxassis Orxan Sivrikaya Uzbekistan Airways boshqaruv raisining o‘rinbosari etib tayinlandi. Bu haqda Korporativ axborot yagona portalidagi ma’lumotlarda ko‘rsatilgan deya xabar bermoqda "Daryo" nashri.

Mazkur tayinlov qarori kompaniya aksiyadorlarining 18 iyun kuni bo‘lib o‘tgan navbatdan tashqari umumiy yig‘ilishida bir ovozdan tasdiqlangan.

Orxan Sivrikaya Bosfor universitetini tamomlagan. Turkiya, Yevropa va Shimoliy Amerikada turli lavozimda faoliyat yuritgan. Jumladan, Turkish Airlines vitse-prezidenti bo‘lgan.

2017 yilning noyabr oyida «O‘zbekiston havo yo‘llari»ning strategik rivojlanish bo‘yicha maslahatchisi bo‘lgan. Aviakompaniyani rivojlantirish strategiyasi, jadvallarni optimallashtirish, samolyotlar parkini rejalashtirish, marketing va boshqalarni ishlab chiqishda ishtirok etgan.