Коррупцияга қарши давом этаётган кенг миқёли кураш фонида Бразилия прокуратураси мамлакатнинг собиқ президенти Луис Инасио Лула да Силва ҳамда унинг мулозимларини миллионлаб долларга тенг порани ўзлаштириш учун жиноий гуруҳ тузганликда гумон қилмоқда. Бу ҳақида Associated Press​ агентлиги хабар берди.

Бош прокурори Родриго Жанот эълон қилган баёнотга кўра, яна бир собиқ президент Дилма Руссеф ҳамда унинг ҳукуматида ёки партиясида ишлаган бир қанча сиёсатчиларнинг ҳам исмлари Олий Федерал Трибуна билан биргаликда тузилган айбномада қайд қилинган.

Луис Инасио Лула да Силва, Дилма Руссефф ва уларнинг собиқ мулозимлари 2002 йилдан 2016 йилгача бўлган муддат давомида давлат идораларидаги қудрати орқали қарийб 480 миллион долларлик пора олишда айбланган. Да силва 2002 йилда Бразилия президенти этиб сайланган эди. Луладан кейин Дилма Руссефф президентлик курсисини эгаллаган, аммо 2016 йилда бюджет маблағларини ноқонуний ишлатишда айбланган президент импичмент орқали лавозимидан озод қилинган.

Охирги вақтларда Бразилияда коррупцияга қарши кенг қамровли кураш олиб борилмоқда. Собиқ президент Лулага нисбатан бир қатор жиноий ишлар қўзғатилган бўлиб, ҳозирча унга нисбатан 9,5 йиллик озодликдан маҳрум қилиш жазоси тайинланган. Айни пайтда амалдаги президент Мишел Темерга қарши коррупциявий жанжал ҳам давом этмоқда. Прокурорларнинг президентни жавобгарликка тортиш тўғрисидаги сўрови парламентда етарлича овоз тўплай олмагани сабаб темр ўз вазифасида қолдирилган.