Туркия жануби-ғарбида жойлашган Мугла провинцияси суди ўтган йилнинг июлида мамлакатда амалга оширилган давлат тўнтаришига уриниш вақтида Туркия президенти Тойиб Эрдўғонга суиқасд уюштирганликда айбланаётган 31 кишини умрбод қамоқ жазосига маҳкум этди, деб хабар қилди чоршанба куни NTV телеканали.

Эрдўғонга суиқасд уюштиришда айбланаётганлар устидан суд жараёни март ойида бошланган эди. Тергов жараёни радикал ислом тарғиботчиси Фатхулла Гюленнинг 47 тарафдори устидан олиб борилган, уларнинг уч нафари қидирувга берилган.

Айбланувчилар рўйхатининг биринчи қаторида ҳозирда Американинг Пенсильваниясида яшаётган Гюлен ўрин олган.

Эслатиб ўтамиз, 2016 йилнинг июлида, Туркияда давлат тўнтаришига уриниш содир этилган оқшомда, исёнчи ҳарбийлар Мармарисда Туркия президенти ҳордиқ чиқараётган меҳмонхонага ҳужум уюштиришган.

Ҳужум Эрдўғон отелни тарк этгач бир неча дақиқадан сўнг амалга оширилган. Ушбу суиқасднинг олдини олишга ҳаракат қилган икки полициячи ўлдирилган.

Туркия ҳукумати Гюленни давлат тўнтаришини амалга оширишга уринишда айблашган ва АҚШдан унинг экстрадациясини талаб қилишган эди. Гюленнинг ўзи исённи қоралаган ва бу ҳаракатларга алоқадор эмаслигини айтган. Эрдўғоннинг ўзи илгарироқ ушбу ҳодисалардан сўнг Гюлен ташкилотига алоқадор бўлган 50 минг киши ҳибсга олингани ва 140 мингга яқин давлат хизматчилари ишдан бўшатилгани ҳақида баёнот берган эди.