Солиқ тўловчилардан келиб тушаётган мурожаатларни инобатга олган ҳолда, “Солиқчи-кўмакчи” тамойили асосида, бугундан бошлаб 20 кун давомида 2022 йил 1 январдан (1 январ ҳам киради) хато чоп этилган онлайн-НКТ чекларини таҳрирлашга имконият берилди. Бу ҳақда СДҚ  матбуот хизмати хабар берди.

Бунинг учун солиқ тўловчининг my.soliq.uz сайтидаги шахсий кабинетида “ЮШ онлайн-НКМ ва виртуал касса маълумотлари” саҳифасидан  “Таҳрирлаш” бўлимига кирилади. Қидирув тизимига чекнинг фискал модул ID ва рақамини киритиб тузатиладиган чек топилади. Очилган ойнада чек маълумотлари таҳрирланади.

Хусусан, чек маълумотларини таҳрирлашда қуйидагиларни ўзгартириш мумкин:
- МХИК;
- миқдори;
- ўлчов бирлиги;
- чек суммаси;
- комитент СТИРи; 
- тўлов тури (нақд пул ёки банк карта).

Барча ўзгартиришлар киритилгандан сўнг, фақат битта файл – тадбиркорлик субектининг ҳолат юзасидан батафсил тушунтириши баён этилган расмий хати (муҳрланган фирма бланкида) илова қилиниши лозим.

"Тузатиш киритиш учун юборилган чеклар ҳудудий давлат солиқ бошқармасида тузилган ишчи гуруҳи билан келишилган ҳолда тезкорлик билан ўрганилади.
 Кўриб чиқиш натижаси ижобий деб баҳоланса, чек ҳолати "қабул қилинган"га ўзгаради. 
 Рад этилган тақдирда солиқ органининг изоҳига кўра, тузатишлар киритилиб қайта юборилиши лозим.

Якунда, “Ҳисоблаш” ва “Жўнатиш” тугмаси босилади" дейилади хабарда.

Истисно: истеъмолчиларга харид суммасидан 1 % қайтарилган (кешбек) чеклар таҳрирланмайди.