“UzAuto Motors” 2022 йил якунида Spark ва Nexia автомобилларини ишлаб чиқаришни тўхтатади. Бу ҳақда компания матбуот хизмати хабар бермоқда.
Маълум бўлишича, компания истеъмолчиларнинг замонавий автомобилга бўлган талабининг ортиб бораётганлиги сабабли, ишлаб чиқариш линияларини босқичма-босқич янги автомобиль моделларига ўтказмоқда.
Детройтда General Motors компанияси вакиллари билан моделлар қаторини янгилаш ва ишлаб чиқариш ҳажмини ошириш доирасида ўтказилган музокараларда, UzAuto Motors”заводи ишлаб чиқариш қувватини сезиларли даражада ошириш бўйича келишувга эришилди.
Шунингдек, “Tracker” ва “Onix” билан бир қаторда Chevrolet автомобилларининг замонавий моделлари билан кенгайтириш ва ишлаб чиқарилаётганларини янгилаш (facelift) бўйича ишлар олиб бормоқда.
Конвейерларнинг янги автомобиль моделларини ишлаб чиқаришга ўтказилиши муносабати билан, 2022 йил якунида Spark ва Nexia автомобилларини ишлаб чиқариш тўхтатилади. 2023 йил бошида Onix автомобилини ишлаб чиқариш режалаштирган.
Қолган бутловчи қисмлар йил давомида ушбу автомобиль моделларининг турли конфигурациялардаги сўнгги партияларини чекланган миқдорда ишлаб чиқаришни давом эттириш имконини беради. Бугундан бошлаб, ушбу Spark ва Nexia автомобиллари сотувга чиқарилади.
Шунингдек, Ўзбекистонда UzAuto Motors”автомобилларига бўлган талабнинг юқори эканлигини инобатга олиб, компания Spark ва Nexia автомобиллари экспорт ҳажмининг бир қисмини ички бозорга йўналтиришга қарор қилди.
Четга экспортга жўнатиладиган комплектациялар бир қатор қўшимча опцияларни ўз ичига олади, жумладан: Евро 5 катализаторли двигатель, ERA-GLONASS тизими, иккита рангга эга бўлган корпус ва бошқалар.
Сотувга чиқариладиган автомобиллар комплектациясига қараб, кучайтирилган двигатель, картер ҳимояси, чар қопламали руль, қорайтирилган орқа ойна, қўшимча динамиклар, ён хавфсизлик ёстиқчалари ва механик узатмалар қутиси билан жиҳозланади.