Наманган вилояти ҳокими Шавкат Абдураззоқов Наманган шаҳрининг Амир Темур кўчасидаги собиқ “Кичкинтойлар боғи”да бўлди, деб хабар қилмоқда вилоят ҳокимлиги.
6 гектарни эгаллаган мазкур ҳудудда UMS Holding асосчиси, тадбиркор Алишер Усмонов томонидан Халқаро бизнес маркази қурилиши режалаштирилган. Ушбу марказ Конгресс-холл, бизнес мактаби, меҳмонхона, экопарк, спорт-соғломлаштириш иншоотларини ўз ичига олади. Сунъий кўллар, фавворалар, автотураргоҳлар барпо этилади.
- Халқаро бизнес маркази қурилиши баҳор ойларидан бошланади. Бу ерда келгусида халқаро симпозиумлар, бизнес-форумлар ўтказилиши кўзда тутилган. Шу орқали Наманганга инвестициялар кириб келиши жадаллашади, бизнес-туризм учун кенг имкониятлар яратилади. Мазкур марказ Наманганнинг ўзига хос брендига айланади, - деди вилоят ҳокими.
Шавкат Абдураззоқов қурилиш олиб борилиши режалаштирилган ҳудудда ободонлаштиришга эътибор қаратиш, котлован (пойдевор ётқизиш учун қазилган чуқур - таҳ.) атрофида хавфсизлик масалаларини кўздан қочирмаслик зарурлигини таъкидлади.
Халқаро бизнес маркази барпо этиладиган манзилда Қуръон тиловат қилиниб, жонлиқ сўйилди. Бошланаётган ишларга хайр-барака тиланди, дейилади маълумотда.