АҚШнинг Калифорния штатида яшовчи Пол Гришам бундан ярим асрдан зиёд вақт олдин тушириб қўйган қопчиғини топишга муваффақ бўлди. Бу хабарни “The San Diego Union-Tribune” нашри тарқатган.

Ҳикоя қилишича, у бир вақтлар АҚШ Ҳарбий денгиз кучлари сафида метеорология хизматида ишлаган. Узоқ 1967 йили Антарктикада хизмат ўтаётган чоғи тасодифан ҳамёнини йўқотган ва шу-шу топа олмаган.

Ўтган йил охирида Гришамга метеорология хизмати ходимининг қизидан қўнғироқ бўлди. Жувоннинг айтишича, отасининг бошлиғи нотаниш қопчиқ эгасини аниқлашда ёрдам беришни сўраган. Топилма бино бузилганда юзага чиққан.

Воқеадан бир неча ҳафта ўтиб, портмоне ҳақиқий эгасига қайтарилган. Омадли инсоннинг таъкидлашича, ҳамён ичида ҳайдовчилик гувоҳномаси, солиқ тўғрисидаги декларация, ҳарбий денгиз хизматчиси шахсини тасдиқловчи ҳужжат ва чўнтак маълумотнома харитаси бус-бутун сақланган.