Бугун, 1 июнь куни Ўзбекистон Президенти Шавкат Мирзиёев Шеробод тумани "Бўстон" маҳалласида ташкил этилган анор боғи билан танишди.
Давлат раҳбари иқтисодий комплекс олдига вазифа қўяр экан, ҳар бир ҳудуднинг хусусиятларидан келиб чиқиб лойиҳа қилиш, "ўсиш нуқталари"ни топиб, ривожлантириш зарурлигини таъкидлайди.
Сурхондарё вилоятининг шундай йўналишларидан бири - анорчилик. Айниқса, Шерободнинг анорлари катта, мазали, ҳосилдор бўлади. Шу боис унинг бозори чаққон, довруғи чет элларгача кетган. Бу тадбиркорлар учун катта имконият, аҳоли учун даромад манбаи бўлаётир. Туманда 48 та маҳалланинг 33 таси анор етиштиришга ихтисослашган.
Шундай анорзорлардан бири "Сардорбек Султонбек" масъулияти чекланган жамияти томонидан туманнинг "Бўстон" маҳалласида ташкил этилган. Президент ушбу боғни кўздан кечирди.