Тошкент шаҳар Шайхонтоҳур туманидаги умумий овқатланиш шоҳобчаларидан бирида ёнғин келиб чиқди. Бу ҳақда Фавқулодда вазиятлар вазирлиги ахборот хизмати хабар берди.
Хабарга кўра, ҳодиса 14 март куни соат 20:32 да Шайхонтоҳур тумани Кичик ҳалқа йўли кўчаси 29-уйда жойлашган «Evos» умумий овқатланиш шохобчасида содир бўлган. Маълум бўлишича, ёнғиндан шохобчанинг 10 квадрат метр майдони зарар кўрган. Ҳолат юзасидан Тошкент шаҳар Фавқулодда вазиятлар бошқармасининг ёнғин-қутқарув гуруҳи соат 20:32 да етиб бориб, 20:46 да тўлиқ бартараф этган.
Қайд этилишича, ёнғиндан жабрланган ва ҳалок бўлганлар йўқ. Ёнғиннинг тахминий сабаби ва зарари аниқланмоқда.