Афғонистонда 14 та туман «Толибон» жангариларидан озод қилинди

Афғонистонда 14 та туман «Толибон» жангариларидан озод қилинди

Афғонистон Қуролли кучлари «Толибон» ҳаракати жангариларидан камида 14 та туманни қайтариб олди, деб ёзади «ТАСС» нашрига таяниб "Daryo.uz"
Жанглар чоғида ҳукумат қўшинлари томонидан 2 мингдан ортиқ жангари йўқ қилиниб, 1,4 минг киши ярадор қилинди.

Афғонистон Қуролли кучлари матбуот котиби Ажмал Умар Шинварий маълум қилишича, сўнгги бир ҳафта ичида Афғонистон армияси мамлакатнинг еттита вилоятида, шу жумладан, Бадахшон ва Бадгисда 278 та жанговар операцияларни амалга оширган.

«Толибон» жангарилари эса худди шу даврда 30 дан ортиқ терактлар содир этиб, 43 нафар тинч аҳоли вакилининг ўлимига сабабчи бўлди, 170 киши жабрланди.

Афғонистонда ҳукумат кучлари ва «Толибон» жангарилари ўртасидаги тўқнашувлар АҚШ президенти Жо Байденнинг баёнотидан кейин кучайди, у 14 апрель куни Афғонистондаги операцияни якунлаш қарори ҳақида эълон қилди. 6 июль ҳолатига, АҚШ ўз қўшинларининг 90 фоиздан ортиқ қисмини мамлакатдан олиб чиқиб кетди.