Бухоро вилоятининг Когон туманидаги марказий кўчада йўл ҳаракати қоидаларини бузиб, гуруҳ-гуруҳ бўлиб ҳаракатланган куёвнавкарлар маъмурий жавобгарликка тортилди. Бу ҳақда «Дарё»га вилоят ИИБ ЙҲХБ ахборот хизмати маълум қилди.

Таъкидланишича, 2021 йилнинг 28 июнь куни Когон туманида яшовчи фуқаролар — Ш.Т. ҳамда Н.М.нинг никоҳ тўйи муносабати билан келин-куёвларни ФҲДЁ бўлимига олиб бориш учун олтита автомобиль жалб этилган. Мазкур куёвнавкар ҳайдовчилар автоуловларида марказий кўчада йўл ҳаракати қоидаларини бузиб, гуруҳ-гуруҳ бўлган ҳолда ҳаракатланган.

«Ҳайдовчилар ижтимоий тармоқларда машҳур бўлишни истаб, йўлнинг қарама-қарши томонига ҳам чиқиб ҳаракатланган. Шунингдек, автомобилларга қизил-кўк ёнувчи ‘мигалка’ махсус мосламасини ўрнатиб, овоз кучайтиргичлар орқали шовқин-сурон кўтарган. Ҳолат Когон туман ИИБ йўл ҳаракати хавфсизлиги гуруҳи томонидан зудлик билан рўйхатга олинди ва ҳайдовчиларга чора кўрилди», — дейди Улуғбек Шукруллаев.

Қўшимча қилинишича, давлат рақами 80 D 889 ОА ҳамда 80 V 277 ОА бўлган Spark, шунингдек, давлат рақами 80 E 222 АА бўлган Lacetti ҳайдовчилари Маъмурий жавобгарлик тўғрисидаги кодекснинг 129-моддаси 1-қисми (транспорт воситалари ҳайдовчиларининг йўл ҳаракати хавфсизлигига таҳдид солувчи гуруҳ бўлиб ҳаракат қилишда қатнашиши) ҳамда 127-модда 2-қисми (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) билан жавобгарликка тортилган.

Ҳолат юзасидан автоулов эгалари яшаётган манзилларда ҳам бўлиб, тушунтириш ҳамда профилактик ишлар олиб борилган.