Валюта курси: Ўз.Р.Марказий банки
USD
АҚШ доллари
EUR
Eвро
RUB
Россия рубли
Sayt test rejimida ishlayapti!!!

Сўнгги янгиликлар






Чўчқа ва қўй гибридидан яратилган қўй гўшти Ўзбекистонга келди деган хабарлар ростми?
12.11.2019 10:56,  
10402

Бир неча кун аввал ижтимоий тармоқдаги бир гуруҳда танишим бир видеони ташлаб мутахассис сифатида фикримни сўради. Қисқагина видеода қанақадир ярмаркага олиб чиқилган Белтекс қўй зоти кўрсатилган, видео ортида гапираётган киши эса “бу қанақа қўй бўлди, қўй билан чўчқани чатиштириб яратилганми” қабилида гап айтган.

Видеога эса “Диққат!!! Хитой чўчқа ва қўйнинг чатиштиришидан яратилган, гени ўзгартирилган қўй гўштини Марказий Осиё учун тайёрламоқда. Бундай гўштни ейиш хавфли, у одам генини бузади. Ушбу гўштлар Қозоғистон, Қирғизистон ва Ўзбекистон колбаса цехларига юборилмоқда” деган изоҳ бириктирилган эди.

Мен ўша ерда бу гапнинг асоссизлигини, бу қўйнинг ҳеч қанақа чўчқага, қолаверса Хитойга алоқаси йўқлигини айтдим. Дўстим бу қўй қандай яратилган деб савол берди, мен унга “қўй билан қўйни чатиштириб яратилган” дедим. Ушбу суҳбатни sof.uz журналисти олиб хабар тайёрлади ва сайтда чоп этди.

Хабар матнига бир видео бириктирилган бўлиб, қисқа қилиб айтганда видео бироз нопрофессионал тарзда тайёрланган, уни кўрган одам агар яхшилаб эътибор қилмаса чўчқа ва қўйнинг чатиштирилишидан яратилган қўй гўшти бизга кириб келаяпти экан деган хулосага бориши мумкин. Видео охирида менинг бир гапим ҳам келтирилган. Мана шундан кейин турли ижтимоий тармоқларда менга ушбу видеони юбориб изоҳ сўрайдиганлар сони орта бошлади. Ушбу мақолада масалага батафсил жавоб бермоқчиман.

Биз биладиган қўйлар фанда хонаки қўй деб аталиб, унинг илмий номи Ovis aries. Ушбу қўй тури ёввойи қўйлар – муфлонлардан келиб чиққан. Ҳозирги кунда дунёда қўйларнинг 1000 дан ортиқ зоти мавжуд. Қўйлар гўшт, сут, жун, тивит, пўстинбоп каби йўналишларда етиштирилади. Яхшироқ тушунишингиз учун мисоллар келтираман. Мана Ўзбекистонда ҳисори қўйлар жуда машҳур, улар айнан гўшт йўналишидаги қўйлар ҳисобланади. Ҳар битта ҳисори қўй 80-100 кг гўшт беради, думбасининг оғирлиги 25 кг гача боради. Машҳур қоракўл қўйлари эса айнан майин тивит жунли тери учун етиштирилади. Ушбу қўй терисидан тикилган телпак ва бошқа кийимларнинг нақадар қимматлигини билсангиз керак.

Белтекс ҳам худди мана шундай оддий қўй зоти. У 1989 йилда Буюк Британияда яратилган. Белгия текстил қўй зотидан яратилгани учун ушбу сўзларнинг биринчи бўғинларини ўзаро қўшиб “белтекс” деб ном беришган. Белтекс айнан гўшт йўналишидаги қўй зоти ҳисобланади. У Британияда маҳаллий қўй зотлари билан чатиштириш натижасида яратилган. Бу қўйнинг чўчқага ҳеч қандай алоқаси йўқ, худди шундай Хитойга ҳам. Интернетда Белтекс қўй зоти жамияти деган катта бир сайт бор, у ерда ушбу қўй зоти ҳақида барча маълумотлар берилган, қолаверса facebookда ҳам айни шу жамиятнинг саҳифаси бор, у ерда ҳам бемалол Белтекс қўйлари ҳақидаги видеоларни кўришингиз мумкин (юқоридаги сурат муаллифи: Beltex New Zealand).

Шу ўринда биолог мутахассис сифатида бир нарсага изоҳ бериб кетмоқчиман. Бирор бир ҳайвон тури билан иккинчи бир бошқа ҳайвон турини чатиштириб оралиқ дурагай тур олинмайди. Бу фан учун ҳам ниҳоятда қийин ва олинган тақдирда ҳам у насл бермайди. Генетиканинг фундаментал қонунлари бунга йўл бермайди. Шу боис турли ҳайвонларни чатиштириб олинган организм деганга ўхшаган хабарларга дуч келсангиз, билинг-ки бу юқори эҳтимоллик билан ёлғон. Бундай хабарларга алданиб қолманг, маълумотларни текширинг ёки энг камида мутахассислар фикрини сўранг.

Тавсия этамиз






Тавсия этамиз

Ҳар доим хабардор бўлинг!

carzone.uz мобил иловаларини кўчириб олинг ва барча янгиликлар сиз билан