Ижтимоий тармоқда Тошкентнинг Яшнобод тумани аҳолиси Халқ депутатлари Бўстонлиқ туман Кенгаши депутати, «Миллий тикланиш» партиясидан бўлган Кабул Дусов Махтумқули кўчасидан 22-авиашаҳарчага алоҳида ўзи учун кириш йўлини очмоқчилигидан норозилиги тасвирланган видео тарқалди.

«Депутат Дусов Махтумқули кўчасидан 22-авиашаҳарчага кириш учун ўзига мўлжаллаб алоҳида йўл очмоқчи. У 30-сонли турар жой биносининг биринчи қаватини офис қилиб олган. Аҳолининг барчаси ушбу кириш йўлига қарши. У ерда жойлашган болалар майдончасига ҳам зарар етган. Барча масъул шахслар жим. Ҳамма ишлар аҳолининг розилиги олинмасдан қилиняпти», — дейди фуқаролардан бири.

15 октябрь куни олинган видеодан кўриш мумкинки, депутат Дусов «ЗиЛ» машинасига ортилган ниманидир ўзи кўрсатган жойга ҳайдашни буюрмоқда. Бунга қаршилик кўрсатаётган аҳолига эса депутат қизиққонлик билан қўпол жавоб қайтармоқда.

Ҳатто машина қаршисида турган бир фуқарони итариб юборишга ҳам уринган. Уни тинчлантиришга уринган маҳалла фаолларига ҳам эътибор қаратмасдан, депутат шу ерда истиқомат қилишини ва машинани барибир ҳайдатишини таъкидлаган.