Уч кунлик гуманитар танаффусдан сўнг Россия ва Сурия қўшинлари Ҳалаб шаҳрини яна ҳаводан ўққа тута бошлади, деб хабар бермоқда CNN телеканали.

Ҳалабдаги гуманитар танаффус пайшанба куни бошланган бўлиб, Россия томонидан аҳолига шаҳарни 8 соат ичида ташлаб кетиш таклиф қилинган эди. Пайшанба куни бошланган гуманитар танаффус якшанба кунигача давом этган. Танаффус давомида ҳам кичик тўқнашувлар кузатилган. Россия расмийлари 3 кунлик танаффус давомида исёнчилар томонидан 70 га яқин қуролли қаршилик содир этилганини маълум қилган.

Ҳалаб аҳолиси эса пайшанба куни тунда ҳукумат аскарлар бир неча бор ҳужумга ўтганини айтишган. Ҳар икки тараф бир-бирини тинч аҳолини эвакуация қилишга қаршилик кўрсатишда айблаган. Россия ОАВ жума куни қуролли мухолифат вакиллари томонидан аҳолининг шаҳарни тарк этишига тўсқинлик қилинганини хабар қилган. Мухолифат эса одамлар шаҳардан чиқишда ҳукумат аскарлари тазйиқига учраганини билдиришган. 

Гуманитар танаффус якшанба куни ўз ниҳоясига етди. Россия мудофаа вазирлиги гуманитар танаффус шанба куни ўз ниҳоясига етганини эълон қилди. Ҳалабдан олинган сўнгги маълумотларга кўра, якшанба куни шаҳарни бомбардимон қилиш қайта бошланган. Сурия ҳарбийлари Россияга қарашли самолётлар кўмагида Ҳалаб шарқини ўққа тутган.