Ички ишлар вазирлигининг яна бир ходими коронавирусдан вафот этди

Ички ишлар вазирлигининг яна бир ходими коронавирусдан вафот этди

Соғлиқни сақлаш вазирлигининг хабар беришича, Тошкент шаҳри Олмазор туманида яшаган 51 ёшли З.С. (эркак) 17 июль куни ИИВ Марказий госпиталининг реанимация бўлимига ётқизилган ва 18 июль куни унда “COVID-19” тасдиқланган.

Унга “COVID-19” инфекциясининг оғир кечиши, икки томонлама пневмония ташхиси қўйилган. Беморда касаллик ўткир нафас ва юрак қон-томир етишмовчилиги асорати билан кечган.

Шунингдек, унда юрак ишемик касаллиги, қандли диабетнинг ўта оғир кечиши, иккала болдир артериялари окклюзияси, чап сон ёнбош артерияси стенози, сурункали панкреатит каби ҳамроҳ хасталиклар бўлган.

Беморга мутахассислар томонидан онлайн консультация ва консилиумлар ўтказилган, даволаш жараёни белгиланган стандартлар асосида олиб борилган.

Асосий касаллик асоратлари ҳисобига беморнинг аҳволи кескин оғирлашиб, мутахассислар томонидан тўлиқ ҳажмда, стандарт асосида ўтказилган реанимацион муолажаларга қарамасдан у ўткир нафас ва юрак қон-томир етишмовчилигидан вафот этган.

Аввалроқ ИИВ юу ҳақда хабар бериб, ходимнинг вафоти муносабати билан таъзия изҳор қилганди:

"Ички ишлар вазирлиги раҳбарияти ва шахсий таркиби ИИВ Йўл ҳаракати хавфсизлиги бош бошқармаси Ахборот хизмати катта мутахассиси подполковник Сайдалиев Зайир Ахматовичнинг вафоти муносабати билан марҳумнинг қариндош ва яқинларига чуқур таъзия изҳор этади."