Индонезия ва малайзиялик мусулмонлар бу йил ҳаж сафарига бормайди

Индонезия ва малайзиялик мусулмонлар бу йил ҳаж сафарига бормайди

Индонезия ва Малайзия жорий йилда ўз фуқароларини короновирус пандемияси туфайли Ҳаж сафарига  юбормаслигини маълум қилди, дея хабар бермоқда Дин ишлари бўйича қўмита матбуот хизмати.

Бу ҳақида Индонезия Дин ишлари бўйича вазири Фахрур Розий шундай дейди: “Ҳукумат Ҳаж-2020 сафарини бекор қилиш ҳақида қарор қабул қилди. Бу қарорга келиш осон бўлмади, бироқ биз ҳаж даврида зиёратчиларимиз ва уларга хизмат кўрсатувчи ходимларимиз хавфсизлиги учун маъсулмиз”.

Шунингдек Фахрур Розий: “Аввалроқ Индонезия хавфни камайтириш мақсадида ҳажга зиёратчиларнинг ярмини жўнатишни режалаштирган эдик, кейинчалик эса умуман ҳеч кимни  Саудия Арабистонига юбормасликка қарор қилинди” деб таъкидлаб ўтди.

Маълумот учун, Индонезия аҳоли сони бўйича энг катта мусулмон давлати бўлиб, унга бериладиган ҳаж квотаси 221 минг нафар ҳожини ташкил қилади. Уларнинг 90% учун меҳмонҳоналарда жойлар банд қилинган эди.

Шунингдек, Малайзия ҳукумати ҳам коронавирус инфекцияси билан боғлиқ вазият Саудия Арабистони ва бутун дунёда салбийлигича сақланиб қолаётганини эътиборга олиб, бу йил ўз фуқароларини Ҳаж сафарига юбормаслик борасида қарор қабул қилган. Бу ҳақида Малайзиянинг Дин ишлари бўйича вазири Зулкифи Муҳаммад ал-Бакрий хабар берди.

Муҳаммад ал-Бакрий Куала-Лумпур шаҳрида бўлиб ўтган матбуот анжуманида шундай деди: “Хабарингиз бор, Ҳаж-2020 мавсумини ташкил этмаслик бўйича Малайзия Соғлиқни сақлаш вазирлигининг баёнотида ҳам алоҳида таъкидланди. Чунки, ҳозирда короновирус пандемияси билан боғлиқ вазият дунё бўйлаб мураккаблигича қолмоқда, бундай вазиятда таваккал қилиш мумкин эмас. Ҳаж мавсумини бекор қилиш масаласи 9 июнь куни бўлиб ўтган Ислом ишлари бўйича Миллий Кенгаш мажлисида кўриб чиқилган ва хулосавий қарор қабул қилинди”.

Шунингдек, Муҳаммад ал-Бакрий: “Бу қарорни қабул қилиш жуда қийин бўлди, чунки мусулмон инсон учун ҳаж сафарини нақадар муҳим эканини ҳаммамиз яхши биламиз, лекин мавжуд вазият шуни талаб қилди”, деди.